Báturin

Við at velja røttu vørurnar og at hugsa seg um, tá báturin skal viðlíkahaldast, og tá serliga dálkandi burturkast frá bátinum skal burturbeinast, kunnu bátaeigarar gera sítt til, at halda umhvørvið reint.

Val av vørum

Vert at hugsa um, tá báturin verður riggaður til:

• Er neyðugt at nýta serligu evnini?

Summar vørur eru serliga virknar, júst tí at tær innihalda sterk kemikalii. Hesar eru ofta vandamerktar. Ber til at nýta aðrar vørur ella arbeiðsháttir?

• Hvat gert tú við leivdir, sum innihalda loysievni?

Loysievni og aðrar kemikaliivørur skulu ikki stoytast á sjógv. Sjálvt smáar nøgdir kunnu dálka umhvørvið. Letur tú leivdir av kemikalium til góðkenda móttøku?

• Kanst tú nýta aðra botnmáling?

I botnmáling eru týningarevni - biocid - t.d. kopar og zink, sum forða fyri vøkstri á skrokkin. Nógvar av hesum vørum hava skaðilig árin á lívið i sjónum. Eru minni skaðilig evni á marknaðinum? T.d. ber til at velja serliga harða og slætta máling, sum ger, at gróður ikki festir seg. Les meira um botnmáling her.

Bátavask - Bátaeigarar spula bátin

Stundum verða bátar tiknir upp, og botnurin trýstspulaður. Kopar og onnur eitrandi evni kunnu vera í botnmálingini. Tú eigur tí at spula bátin á einum stað, sum er ætlað til endamálið, og har til ber at savna málingaleivdir og annað saman, og burturbeina tað sum serliga dálkandi burturkast.

Serliga dálkandi burturkast frá bátum

Bátaeigarar og brúkarar hava skyldu til at lata burturkastið til góðkendan móttakara. Dømi um serliga dálkandi burturkast í bátahyljum:

• Málingaleivdir og loysingarevni,
• Motorolja og smyrjiolja,
• Oljudálkað kjalarvatn,
• Brúkt elektrisk og elektronisk útgerð,
• Akkumulatorar,
• Annað dálkandi burturkast, sum t.d. battarí og blýleivdir. 

Les meira um serliga dálkandi burturkast her

	Vit tú vita meira? Um tú hevur spurningar um kemisk evni í vørum, so ring til Umhvørvisstovuna, tlf. 342400, ella skriva til okkara á us@us.fo